14 Шіл 2023

Таңдаған мамандығына адалдығы үшін

Кәсіби мереке қарсаңында «Қазахмыс Смэлтинг» ЖШС-нің Балқаш мыс қорыту зауытында үздік металлургтердің есімдері Еңбек Даңқы галереясына енгізіліп, құрмет көрсетілді.

Салтанатты шарада Металлургтер күнімен өндіріс жөніндегі директор Марат Әубәкіров құттықтап, 34 қызметкерге «Қазақмыс Холдинг» ЖШС директорлар Кеңесі төрағасының және «Қазақмыс корпорациясы» ЖШС Басқарма төрағасының Құрмет грамоталарын табыс етті.

Құрмет тақтасынан 32 қызметкер лайықты орын алды – бұлар тәлімгерлер, өндіріс озаттары және үздік нәтиже көрсеткен жас мамандар. Сондай-ақ, 8 қызметкер «Еңбек озаты» кәсіподақ ұйымының салалық төсбелгісімен, тағы 70 адам Құрмет грамоталарымен марапатталды. 50 адам «Аманат» партиясының алғыс хаттарына ие болды.

Сондай-ақ, бір топ жас мамандар жастар қанатының құрмет грамоталарымен марапатталды.

Сондай-ақ, Еңбек даңқы галереясында БМЗ цехтары арасында өндіріс мәдениеті бойынша өткен байқаудың қорытындысы шығарылды. Аталмыш байқауда шихта дайындау цехы (цех бастығы Алмас Сыздықбеков) үздік деп танылса, мыс электролиз цехы (цех бастығы Мәди Әбдуалиев) екінші, мыс балқыту цехы (цех бастығы Байтас Сүлейменов) үшінші орынды иеленді.

«Менің зауытым – менің өмірім» БМЗ аумағын абаттандыру бойынша үздік эскиз байқауында бұрғылаушы Роза Нұрғалиева бірінші орынды иемденсе, сорғы қондырғысының машинисі Елена Никифороваға екінші орын, ал электролизші Мырзағалы Мұқановқа үшінді орын бұйырды.

ЛӘЗЗАТ СМАҒҰЛОВА