22 Нау 2024

Ұлттық салт дәстүрді ұлықтаған өндіріс озаттары

1,2,3 Жезқазған байыту фабрикалары Наурыз мейрамы қарсаңында жұмыскердер арасында қазақы салт-дәстүрлерді көрсетуден сайыс өткізді. Бұл дегеніміз, ұлттық құндылықтарды дәріптеп, оны келешек ұрпақ санасына сіңіру. Өндіріс өрендері де өнерден құр алақан еместіктерін қойылымдар барысында байқата білді.

Көрісу, қыз айттыру, сырға салу, жарапазан айту, құда күту, тоқымқағар, қымызмұрындық жасау, басқа да салт - дәстүрлерді көрсеткен жұмыскерлер, жиналғандардың көңілін көтерді. Дәстүрімізді дәріптеген жұмысшылар тобы бір театр десе де болатындай.

Сайыс барысын бақылап, баға берген қазылар алқасы бірінші орынды 1- ұнтақтау корпусы командасына берді. Бірінші орын алған командаға бригадирлер кеңесі атынан ақшалай сертификат табысталды. Екінші орынды 1,2,3 Жезқазған байыту фабрикалары, басқарма командасы еншілеп ақшалай жүлдеге ие болды. Үздік үштікті 1 - бас корпус командасы түйіндеп ақшалай сертификат қанжығалады. Бұдан бөлек ынталандыру ретінде төрт командаға ақшалай сертификаттар табыс етілді. Сайыс соңында қатысушыларға арнайы құрылған киіз үйлерде ақ дастархан жайылып,ауыз ашар берілді.