27 Қыр 2023

ӨНДІРІСТІ ЖАҢҒЫРТУ ЖӘНЕ ҚУАТТЫЛЫҚТЫ АРТТЫРУ

«Қазақмыс» тобының құрамына кіретін төрт компания «Иннопром. Қазақстан» халықаралық көрмесінде өздерінің инновациялық жобаларын таныстырды.

Өнеркәсіптік көрмеге барлығы 700-ге жуық компания қатысты. Әр түрлі елдердің машина, станок және кеме жасау, химия, авиация, металлургия және тоқыма өнеркәсібінің мамандары - саланың даму мәселелері мен перспективаларын талқылады. «Қазақмыс» тобы атынан- «Maker (мейкер)» ЖШС, «Kazakhmys Barlau (Қазақмыс Барлау)» ЖШС, «QazaqGeophysics» ЖШС, «KAZ GREEN ENERGY» ЖШС презентациялар өткізді.

«Иннопром.Қазақстан» көрмесінде «Қазақмыс» таныстырған жобалардың бірі «жасыл» электр энергиясын құру жобасы болды. Бұл - күн электр станциялары, гидростанцияларды жобалау және салу.

«Бүгін біз Шығыс өңірінде, атап айтқанда ШҚО, Күршім өзенінде су электр станциясының құрылысын зерттеумен айналысамыз. Бұл біздің перспективалы басым жобаларымыз», - деді «KAZ GREEN ENERGY» ЖШС Бас директоры Валерий Сибагатулин.

Сондай-ақ, көрмеде «Kazakhmys Smelting (Қазақмыс Смэлтинг)» ЖШС өндірістерінде жаңа мыс балқыту технологияларын енгізу, ҚҚМЗ-да мамандандырылған тау-кен жабдықтары мен шахталық желдеткіштерді дайындау бойынша жобалар таныстырылды, бұл – болашақта аталған өндіріс түрлерін Қазақстан аумағында шоғырландыруға мүмкіндік береді.